BluePrint - tipi molekular i karcinomës së gjirit për terapi optimale

BluePrint analizon 80 gjene dhe ndihmon në zbulimin e biologjisë së fshehur të tumorit për të përcaktuar se çfarë e nxit rritjen e tumorit. Klasifikimi i mëtejshëm në një nga katër kategoritë ose nëntipet, Luminal A ose B, HER2 ose tipi Bazal, ofron informacione të rëndësishme që mjeku juaj i përdor për vendime të personalizuara mbi trajtimin.

• Tipi Luminal Karcinoma e tipit luminal drejtohet kryesisht nga rrugët hormonale të estrogjenit dhe progesteronit. Ky nëntip mund të ndahet më tej me anë të MammaPrint-it në karcinomë të tipit luminal A (rrezik i ulët) dhe karcinomë të tipit luminal B (rrezik i lartë). Këto nëntipe luminale kanë rezultate dukshëm të ndryshme dhe prandaj këto informacione duhet të përfshihen në planifikimin e trajtimit për të rritur gjasat e shërimit.
• Tipi HER2 Karcinomat e tipit HER2 drejtohen kryesisht nga rruga e HER2. Ky nëntip molekular nuk përputhet gjithmonë me rezultatet HER2 të nxjerra nga IHC ose FISH, por pacientët me tipin HER2 kanë përgjigje të shkëlqyeshme ndaj terapive të synuara HER2 në kontekst neoadjuvant. Në fakt, me përparimet në terapi, pacientët me tipin HER2 kanë rezultate afatgjata të mira kur trajtohen me barna të synuara ndaj HER2.
• Tipi Bazal Tumoret e tipit bazal nuk drejtohen nga rrugët ER, PR apo HER2 dhe sillen më shumë si tumore klinikisht trefish negative. Ky nëntip molekular është më agresiv dhe pacientet mund të përfitojnë nga regjimet standarde ose të reja të trajtimit të karcinomave të gjirit trefish negative. Duke pasur parasysh natyrën agresive të këtyre tumoreve, pacientët e përshtatshëm mund të përfitojnë nga trajtimi neoadjuvant, e jo nga ai adjuvant.

Përcaktimi i nëntipit molekular zakonisht kryhet në laboratorët patohistologjikë, me anë të analizës imunohistokimike të receptorit të estrogjenit dhe progesteronit, proteinës HER2 dhe indeksit të proliferimit Ki67. Megjithatë, këto analiza kryhen në laboratorë individualë, ku kontrolli i cilësisë rrallëherë ose asnjëherë nuk kryhet; standardet mund të jenë të diskutueshme, dhe rezultatet nuk janë gjithmonë të besueshme. Edhe në analizat e kryera në laboratorë shumë të standardizuar, testimi BluePrint herë pas here riklasifikon tumorin në nivel molekular, që do të thotë se as me një analizë imunohistokimike korrekte dhe cilësore nuk mund të zbulohet gjithmonë natyra dhe biologjia e vërtetë e tumorit.