Cistat e gjirit

Cistat e gjirit janë thasë të mbushur me lëng brenda gjirit. Zakonisht janë jokanceroze (beninje). Mund të keni një ose më shumë cista të gjirit. Cista e gjirit shpesh ka konsistencë të ngjashme me rrushin ose ballonin e mbushur me ujë, por ndonjëherë mund të jetë edhe e fortë.

Nuk kërkojnë trajtim përveç nëse janë të mëdha, të dhimbshme ose shkaktojnë siklet. Në atë rast, nxjerrja e lëngut prej saj mund të lehtësojë simptomat.

Edhe pse mund të shfaqen te gratë e çdo moshe, janë më të shpeshta te gratë para menopauzës, zakonisht më të reja se 50 vjeç. Gjithashtu shfaqen shpesh te gratë në postmenopauzë që përdorin terapi hormonale.

Cista e gjirit, thasë ovale ose të rrumbullakëta të mbushura me lëng, mund të lëvizin lehtë kur i shtypni.

Simptomat

Cistat e gjirit mund të shfaqen në njërin ose në të dy gjinjtë. Shenjat dhe simptomat e cistës së gjirit përfshijnë:

• Një gunga të lëmuar, lehtësisht të lëvizshme, të rrumbullakët ose ovale me buzë të qarta – çka zakonisht, por jo gjithmonë, tregon se është beninje
• Sekretim nga thithka që mund të jetë i tejdukshëm, i verdhë, ngjyrë kashte ose kafe të errët
• Dhimbje ose ndjeshmëri të gjirit në zonën ku ndodhet gunga
• Rritje të madhësisë së gungës dhe ndjeshmëri të gjirit menjëherë para menstruacionit
• Zvogëlim të madhësisë së gungës dhe zhdukje të simptomave të tjera pas menstruacionit

Të kesh cista të gjirit nuk rrit rrezikun e kancerit të gjirit. Megjithatë, prania e cistave mund ta vështirësojë vërejtjen e gungave të reja ose ndryshimeve të tjera që duhet t'i vlerësojë mjeku. Gjinjtë tuaj mund të jenë të pabarabartë dhe të dhimbshëm gjatë menstruacionit, prandaj është e rëndësishme të njiheni me strukturën e tyre natyrale gjatë ciklit menstrual për t'i vënë re më lehtë ndryshimet.

Kur të vizitoni mjekun

Indi normal i gjirit shpesh mund të jetë i pabarabartë ose nodular. Megjithatë, nëse vëreni një gungë të re në gji që nuk zhduket, rritet ose zgjat më shumë se një apo dy cikle menstruale, drejtohuni menjëherë te mjeku. Vizitoni mjekun edhe nëse vëreni ndryshime të reja në lëkurën e njërit apo të dy gjinjve.

Mund t'ju interesojë: Kur gunga nuk është vetëm një gungë e zakonshme?

Shkaqet

Çdo gji përmban lobe indi gjëndror të shpërndara si petalet e një luleje. Lobet ndahen në lobula më të vogla që gjatë shtatzënisë dhe ushqyerjes me gji prodhojnë qumësht. Indi mbështetës që i jep gjirit formë përbëhet nga ind dhjamor dhe lidhor. Cistat e gjirit formohen nga grumbullimi i lëngut brenda gjëndrave të gjirit.

Cistat e gjirit mund të klasifikohen sipas madhësisë:

• Mikrocistat mund të shihen gjatë imazherisë, si mamografia ose ultratingulli, por janë shumë të vogla për t'u ndjerë me prekje.
• Makrocistat janë mjaftueshëm të mëdha për t'u prekur dhe mund të arrijnë deri në 1 deri 2 inç (2,5 deri 5 centimetra) në diametër.

Ekspertët nuk e dinë shkakun e saktë të formimit të cistave të gjirit. Ato mund të zhvillohen si pasojë e ndryshimeve hormonale gjatë ciklit mujor menstrual.

Më shumë tema të dobishme mund të lexoni në blogun tonë.

Burimi: Mayo Clinic