Karcinoma lobulare in situ (LCIS)

Karcinoma lobulare in situ (LCIS) është një gjendje në të cilën qelizat abnormale formohen në gjëndrat e qumështit (lobulat) në gji. Karcinoma lobulare in situ (LCIS) nuk është kancer, por diagnoza e LCIS-it tregon një rrezik të shtuar për zhvillimin e kancerit të gjirit.

LCIS-i zakonisht nuk zbulohet me mamografi. Kjo gjendje më së shpeshti zbulohet pas një biopsie të gjirit e cila kryhet nëse ekziston një nyjë e dyshimtë në gji ose një abnormalitet në mamografi.

Gratë me LCIS kanë rrezik të shtuar për zhvillimin e kancerit invaziv të gjirit. Nëse ju është diagnostikuar LCIS, mjeku juaj mund të rekomandojë kontrolle më të shpeshta të gjirit dhe të shqyrtojë trajtime mjekësore për uljen e rrezikut nga shfaqja dhe zhvillimi i kancerit invaziv të gjirit.

Karcinoma lobulare in situ

Karcinoma lobulare in situ (LCIS) zhvillohet në gjëndrën e qumështit (lobul) dhe nuk përhapet në indin përreth të gjirit.

Simptomat

Karcinoma lobulare in situ (LCIS) zakonisht nuk shkakton asnjë shenjë apo simptomë. Duke qenë se LCIS-i tregon rrezik të shtuar për zhvillimin e kancerit invaziv të gjirit, rekomandohet monitorim i kujdesshëm nga mjeku nëse prania e tij zbulohet gjatë ekzaminimit. Mjeku juaj mund të zbulojë LCIS-in rastësisht, për shembull, gjatë një biopsie të gjirit për të vlerësuar nëse bëhet fjalë për një nyjë beninje apo malinje në gji, ose gjatë ekzaminimit të një zone të dyshimtë të gjetur në mamografi.

Kur t'i drejtoheni mjekut

Caktoni një takim me mjekun nëse vëreni ndryshime në gji, siç janë një nyjë, një zonë e lëkurës që është e rrudhosur ose duket e pazakontë, trashje nën lëkurë, ose sekrecion nga thithka. Bisedoni me mjekun se kur duhet të mendoni për skriningun e kancerit të gjirit dhe sa shpesh duhet përsëritur. Shumica e specialistëve rekomandojnë skrining të rregullt për kancerin e gjirit duke filluar nga mosha 40 vjeç. Bisedoni me mjekun tuaj se çfarë është më e mira për ju.

Shkaqet

Nuk është plotësisht e qartë se çfarë shkakton LCIS-in. LCIS-i fillon kur qelizat në gjëndrën e qumështit (lobul) të gjirit zhvillojnë mutacione gjenetike që shkaktojnë pamje abnormale të gjirit. Këto qeliza abnormale mbeten në lobul dhe nuk përhapen apo depërtojnë në indin fqinj të gjirit.

Nëse LCIS-i zbulohet gjatë një biopsie të gjirit, kjo nuk do të thotë që keni kancer. Megjithatë, prania e LCIS-it rrit rrezikun tuaj për zhvillimin e kancerit të gjirit dhe rrit shanset për zhvillimin e kancerit invaziv të gjirit.

Konsiderohet se rreziku i kancerit të gjirit tek gratë të cilave u është diagnostikuar LCIS është afërsisht 20 përqind. Me fjalë të tjera, nga çdo 100 gra me diagnozë LCIS, 20 do të zhvillojnë kancer të gjirit, ndërsa 80 nuk do ta zhvillojnë. Rreziku i zhvillimit të kancerit të gjirit tek gratë në popullatën e përgjithshme konsiderohet të jetë rreth 12 përqind. Me fjalë të tjera, nga çdo 100 gra në popullatën e përgjithshme, 12 do të zhvillojnë kancer të gjirit.

Anatomia e gjirit

Çdo gji përmban 15 deri në 20 lobe të indit gjëndror, të rregulluara si petalet e një luleje. Lobet ndahen më tej në lobula më të vogla që prodhojnë qumësht për gjidhënie. Kanale të vogla (duktus) e çojnë qumështin te rezervuari që ndodhet menjëherë nën thithkë.

Informohuni më shumë rreth temave të dobishme në blogun tonë.

Burimi: Mayo Clinic