MRI e gjirit

Rezonanca magnetike e gjirit ose MRI e gjirit – është një test që përdoret për të zbuluar kancerin e gjirit dhe anomali të tjera në gji.

MRI regjistron imazhe të shumta të gjirit tuaj që kombinohen duke përdorur kompjuterin, për të krijuar imazhe të detajuara. MRI e gjirit mund të tregojë shtrirjen e sëmundjes. Gjithashtu mund të përdoret së bashku me mamografinë si një mjet screeningu për zbulimin e kancerit të gjirit te gratë me rrezik të lartë të kancerit ose që kanë histori familjare të kancerit të gjirit.

Pse kryhet

MRI e gjirit përdoret për të vlerësuar shtrirjen e kancerit të gjirit. Gjithashtu përdoret për screeningun e kancerit të gjirit te gratë që konsiderohen me rrezik të lartë të sëmundjes.

Mjeku juaj mund të rekomandojë MRI të gjirit nëse:

• Keni një diagnozë të kancerit të gjirit dhe dëshiron të përcaktojë shtrirjen e kancerit.
• Keni dyshim për rrjedhje ose plasje të implantit në gji.
• Keni rrezik të lartë të kancerit të gjirit.
• Keni histori familjare të kancerit të gjirit ose vezoreve.
• Keni gjinj shumë të dendur dhe mamografia nuk ka zbuluar kancer të mëparshëm të gjirit.
• Keni histori ndryshimesh parakancerogjene të gjirit – si hiperplazia atipike ose karcinoma lobulare in situ.
• Keni ndryshime në gjenet e kancerit trashëgues të gjirit, si BRCA1 ose BRCA2.
• Keni pasur rrezatim të zonës së gjoksit para moshës 30 vjeç.

MRI e gjirit është menduar për t'u përdorur së bashku me mamografinë ose një test tjetër imazherik të gjirit – jo si zëvendësim i mamografisë. MRI e gjirit mund të mos zbulojë disa raste të kancerit të gjirit që mamografia do t'i zbulonte.

Rreziqet

MRI e gjirit pa përdorim rrezatimi është një procedurë e sigurt, por si me çdo test tjetër, ekzistojnë disa rreziqe, si:

• Rezultate false pozitive. MRI e gjirit mund të identifikojë zona të dyshimta që, pas vlerësimit të mëtejshëm, si ultrazëri ose biopsia e gjirit, mund të rezultojnë beninje. Këto rezultate quhen false pozitive. Një rezultat i rremë pozitiv mund të shkaktojë ankth të panevojshëm nëse ju duhet testim shtesë, si biopsia, për të vlerësuar zonat e dyshimta.
• Reaksion alergjik. MRI e gjirit përfshin injektimin e një lënde ngjyruese që lehtëson interpretimin e imazheve. Kjo lëndë mund të shkaktojë reaksione alergjike dhe mund të shkaktojë komplikime serioze te personat me probleme renale.

Si të përgatiteni

Për t'u përgatitur për MRI të gjirit, do t'ju duhet të ndërmerrni hapat e mëposhtëm:

• Rekomandohet që gratë para menopauzës të konsultohen me mjekun se cila është koha më e mirë e muajit për këtë test (nëse cikli menstrual luan ndonjë rol).
• Informoni mjekun tuaj për çdo alergji që keni. Zakonisht gjatë MRI-së përdoret një lëndë ngjyruese që ndihmon në interpretimin e imazheve. Lënda zakonisht jepet përmes një vene në krahun tuaj.
• Tregojini mjekut tuaj nëse keni probleme me veshkat. Lënda që shpesh përdoret për të përmirësuar imazhet e MRI-së quhet gadolinium dhe mund të shkaktojë komplikime serioze te personat me probleme renale.
• Informoni mjekun tuaj nëse jeni shtatzënë. MRI zakonisht nuk rekomandohet për gratë shtatzëna.
• Tregojini mjekut tuaj nëse jeni duke ushqyer me gji. Nëse ushqeni me gji, mjeku juaj mund të rekomandojë të ndërprisni ushqyerjen me gji për dy ditë pas MRI-së. Kolegji Amerikan i Radiologëve thotë se rreziku për bebën tuaj nga kontrasti është jashtëzakonisht i ulët. Megjithatë, nëse jeni të shqetësuar, ndërprisni ushqyerjen me gji 12 deri 24 orë pas MRI-së, gjë që do t'i japë trupit tuaj kohë të eliminojë lëndën kontrastuese. Gjatë kësaj periudhe mund të pomponi dhe hidhni qumështin.
• Mos vishni asgjë metalike gjatë MRI-së. Objektet metalike, si bizhuteritë, kapëset e flokëve dhe orët, mund të dëmtohen gjatë MRI-së. Lini objektet metalike në shtëpi ose hiqini para MRI-së.

Çfarë mund të prisni

Kur të arrini në termin tuaj, do t'ju jepet një fustan ose mantel, si dhe udhëzime për të hequr rrobat dhe bizhuteritë. Nëse keni probleme me qëndrimin në një hapësirë të vogël dhe të mbyllur, tregojini mjekut tuaj para se të kryeni MRI-në e gjirit. Ata mund t'ju japin një qetësues të lehtë.

Është e mundur që t'ju injektohet një lëndë (agjent kontrastues) në mënyrë që indet ose enët e gjakut në imazhet e MRI-së të jenë më lehtë të dukshme.

Aparati i MRI-së ka një hapje të madhe, qendrore. Aparati i MRI-së krijon një fushë magnetike rreth jush, dhe valët radio drejtohen drejt trupit tuaj. Nuk do ta ndjeni fushën magnetike apo valët radio, por mund të dëgjoni zhurma të forta trokitjeje dhe kërcitjeje brenda aparatit. Për shkak të zhurmave të forta, mund t'ju japin tapa veshësh.

Gjatë ekzaminimit, teknici ju përcjell nga një dhomë tjetër. Mund të flisni me teknikun përmes një mikrofoni. Do t'ju thuhet të frymëmerrni normalisht, por të qëndroni sa më të palëvizshëm. Ekzaminimi mund të zgjasë nga 30 minuta deri në një orë.

Burimi: Mayo Clinic