Nëntipet e kancerit të gjirit

Kanceri i gjirit është një sëmundje malinje që lind kur qelizat normale gjëndrore ndryshojnë vetitë e tyre dhe fillojnë të rriten dhe të shumohen në mënyrë të pakontrolluar, duke shkatërruar indin e shëndetshëm përreth. Këto qeliza më pas mund të kalojnë në enët limfatike dhe/ose gjakut, duke përhapur kështu sëmundjen në pjesë të tjera të trupit. Kanceri i gjirit është sëmundja malinje më e shpeshtë tek gratë. Numri i grave të prekura nga kanceri i gjirit rritet me moshën, në mënyrë më të theksuar pas moshës 45-vjeçare, dhe kulmi i sëmundjes është tek gratë në të pesëdhjetat. Megjithatë, është në rritje edhe numri i grave të reja të prekura nga kanceri i gjirit (30-40 vjeç). Konsiderohet se një nga 8 gra do të vuajë nga kanceri i gjirit.

Faktorët e rrezikut

Faktorët që lidhen me rrezik të shtuar për zhvillimin e kancerit të gjirit:

• mosha
• gjinia (gratë sëmuren më shpesh se burrat)
• anamneza familjare pozitive
• faktorët hormonalë
• gjinj hiperdenzë (të dendur në mamografi)
• gjendje parakanceroze si hiperplazia atipike
• joaktiviteti fizik
• mbipesha pas menopauzës
• ekspozimi më i gjatë ndaj estrogjenit (terapi hormonale, menopauzë e vonshme).

Simptomat

Kanceri i gjirit nuk shkakton dhimbje, dhe në stad të hershëm nuk jep asnjë simptomë apo shenjë. Pikërisht për këtë arsye është e nevojshme të bëhen kontrolle dhe ekzaminime rutinore më shpesh. Kur fillojnë të shfaqen shenjat, sëmundja zakonisht ka përparuar tashmë. Shumica e rasteve të kancerit të gjirit mund të trajtohen nëse zbulohen me kohë. Trajtimi i kancerit të gjirit përfshin disa opsione terapeutike që synojnë shërimin ose ndalimin e përhapjes së sëmundjes. Probabiliteti i përgjigjes ndaj terapisë është më i lartë nëse trajtojmë me terapi specifike tipin e saktë të kancerit.

Tipet e kancerit të gjirit

Kanceri i gjirit shpesh konsiderohet si një sëmundje e vetme, edhe pse në realitet ekzistojnë disa tipe të ndryshme, secili me karakteristika të veçanta. Çdo kancer gjiri është gjenetikisht unik. BluePrint analizon 80 gjene dhe ndihmon në zbulimin e biologjisë (sjelljes, agresivitetit) të tumorit për të përcaktuar se çfarë e nxit rritjen e tumorit. Tumoret e gjirit zakonisht klasifikohen bazuar në praninë e 3 llojeve të ndryshme të proteinave në sipërfaqen e tyre: receptorët e estrogjenit, progesteronit dhe HER2. Klasifikimi i mëtejshëm në një nga katër kategoritë ose nëntipet, Luminal A ose B, HER2 ose tipi Bazal, ofron informacione të rëndësishme që mjeku juaj i përdor për vendime të personalizuara trajtimi:

• Karcinoma e tipit luminal nxitet kryesisht nga rrugët sinjalizuese hormonale të estrogjenit dhe progesteronit. Ky nëntip mund të ndahet më tej me anë të testit MammaPrint në karcinomë të tipit luminal A (rrezik i ulët) dhe karcinomë të tipit luminal B (rrezik i lartë). Këto nëntipe luminale kanë rezultate dukshëm të ndryshme, prandaj këto informacione duhet përfshirë në planifikimin e trajtimit për të rritur mundësinë e shërimit.
• Karcinomat e tipit HER2 nxiten kryesisht nga rruga e HER2. Ky nëntip molekular nuk përputhet gjithmonë me analizat imunohistokimike ose të hibridizimit in-situ për HER2, por pacientët me tip HER2 kanë përgjigje të shkëlqyer ndaj terapisë së synuar për HER2 në kontekst neoadjuvant. Në fakt, me përparimet në terapi, pacientët me tip HER2 kanë rezultate afatgjata të mira kur trajtohen me barna biologjikë të synuar që bllokojnë HER2.
• Karcinomat e tipit bazal nuk nxiten nga rrugët e ER, PR apo HER2 dhe sillen më shumë si tumore klinikisht trefish negativë. Ky nëntip molekular është më agresiv dhe pacientet mund të përfitojnë nga regjimet standarde ose të reja të trajtimit për kancerin e gjirit trefish negativ. Duke pasur parasysh natyrën agresive të këtyre tumoreve, pacientet e përshtatshme mund të përfitojnë nga trajtimi paraoperativ (neoadjuvant).