Vetëekzaminimi i gjinjve

Çfarë është vetëekzaminimi i gjinjve?

Vetëekzaminimi i gjinjve është një metodë që përfshin ekzaminimin fizik dhe vizual të gjinjve për të vërejtur shenjat dhe simptomat e kancerit të gjirit. Qëllimi i vetëekzaminimit të gjinjve është që të njiheni me pamjen dhe ndjesinë e gjinjve tuaj në gjendje normale. Njohja e mënyrës se si zakonisht duken dhe ndihen gjinjtë tuaj do t'ju ndihmojë të vëreni çdo ndryshim ose anomali në gjinj, si formime të reja ose ndryshime në lëkurë. Çdo ndryshim në gjinj i zbuluar gjatë vetëekzaminimit duhet t'i raportohet menjëherë mjekut tuaj.

Edhe pse vetëekzaminimi i gjinjve është një metodë e dobishme për zbulimin e hershëm të kancerit të gjirit, nuk duhet të zëvendësojë mamografitë e rregullta dhe ekzaminimet klinike të gjinjve.

Sa shpesh duhet të bëhet vetëekzaminimi i gjinjve?

Grave të rritura të të gjitha grupmoshave u rekomandohet të bëjnë vetëekzaminim të gjinjve të paktën një herë në muaj. Lillie D. Shockney, profesoreshë e shquar për kancerin e gjirit në Universitetin Johns Hopkins, deklaron: “Dyzet për qind e kancereve të gjirit të diagnostikuara zbulohen nga vetë gratë që ndjejnë një formim, prandaj vendosja e një vetëekzaminimi të rregullt të gjinjve është shumë e rëndësishme.”

Për gratë që ende kanë cikël menstrual, vetëekzaminimi i gjinjve duhet të kryhet disa ditë pas përfundimit të menstruacioneve. Për ato që janë në postmenopauzë, vetëekzaminimi i gjinjve duhet të kryhet të njëjtën ditë çdo muaj, si p.sh. në ditën e parë ose të pesëmbëdhjetë të muajit.

Ndërsa mamografia mund t'ju ndihmojë të zbuloni kancerin para se ta ndjeni formimin, vetëekzaminimet e gjinjve ju ndihmojnë të njiheni me pamjen dhe ndjesinë e gjinjve tuaj. Njoftoni mjekun tuaj nëse vëreni ndonjë ndryshim në gjinj, si p.sh. një formim i ri, një zonë e dhimbshme, ndryshime në pamjen e lëkurës ose sekrecion nga thithka.

Si duhet të bëhet vetëekzaminimi i gjinjve?

1. Nën dush

Me majat e 3 gishtave tuaj të mesëm, kontrolloni të gjithë gjirin dhe zonën e sqetullës, duke shtypur me presion të lehtë, të mesëm dhe të fortë. Kontrolloni të dy gjinjtë çdo muaj, duke verifikuar nëse ka formime të reja, trashje, nyje të ngurta ose ndryshime tjera në gjinj.

2. Para pasqyrës

Me duart pranë trupit, kontrolloni vizualisht gjinjtë tuaj, duke kërkuar ndryshime në konturën ose formën e gjinjve, gropëzime, fryrje ose parregullsi tjera në lëkurë ose rreth gjinjve, apo ndonjë ndryshim në thithka. Më pas, vendosini pëllëmbët në ije dhe shtypni fort për të tendosur muskujt e gjoksit. Kërkoni për gropëzime, palosje ose ndryshime tjera, veçanërisht në njërën anë. Do të vini re se gjiri i majtë dhe i djathtë nuk janë krejtësisht të njëjtë — pak gra kanë gjinj plotësisht simetrikë.

3. Duke qëndruar shtrirë

Kur qëndroni shtrirë, indi i gjirit shpërndahet në mënyrë të barabartë përgjatë murit të gjoksit. Vendosni një jastëk nën shpatullën e djathtë dhe vendosni dorën e djathtë mbi kokë. Duke përdorur dorën e majtë, lëvizni majat e 3 gishtave tuaj të mesëm rreth gjirit të djathtë, duke mbuluar të gjithë zonën e gjirit dhe sqetullës. Përdorni presion të lehtë, të mesëm dhe të fortë për të ndjerë çdo formim të ri, trashje, nyje të ngurta ose ndryshime tjera në gjinj. Gjithashtu, shtrëngoni thithkën për të kontrolluar nëse ka sekrecion. Përsëritni këto hapa edhe për gjirin e majtë.

A mund të mbështetem vetëm në vetëekzaminimet e gjinjve për të qenë e sigurt se nuk kam kancer të gjirit?

Mamografia zakonisht mund të zbulojë tumoret para se të mund të ndjehen, prandaj ky ekzaminim është thelbësor për zbulimin e hershëm. Por, kur kombinohet me kontrolle të rregullta mjekësore dhe mamografi, vetëekzaminimet e gjinjve mund t'i ndihmojnë gratë të dinë çfarë është gjendje normale për gjinjtë e tyre, në mënyrë që të mund t'i raportojnë mjekut çdo ndryshim.

Nëse ndjeni një formim, caktoni një takim me mjekun tuaj, por mos u trembni — 8 nga 10 formime nuk janë kancerogjene. Për qetësi shtesë, telefononi mjekun tuaj kurdo që keni ndonjë shqetësim.

Shikoni edhe videon me udhëzime për vetëekzaminimin e gjinjve:

Më shumë tema të ngjashme: Blog

Burimi: National Breast Cancer Foundation