Koha për kontroll është tani!

Zbulimi i hershëm

Zbulimi i hershëm është faktori më i rëndësishëm për një prognozë të mirë kur diagnostikohet kanceri. Duke investuar pak kohë për një kontroll të shpejtë, mund të rrisni gjasat që të vazhdoni jetën si zakonisht. Shumë gra nuk i shfrytëzojnë kontrollet e disponueshme për zbulimin e hershëm të kancerit, qoftë për shkak të frikës nga rezultatet, pasigurisë se si mund të duket një kontroll i panjohur, ose thjesht për shkak të shtyrjes. Kjo është shumë problematike, sepse koha është faktori më i rëndësishëm kur bëhet fjalë për diagnozën e kancerit të gjirit.

Vetëkontrolli rutinor

Ekzaminoni gjinjtë tuaj në pasqyrë me duart anash, e më pas me duart e ngritura. Kërkoni ndonjë ndryshim në lëkurë siç janë tërheqjet e lëkurës, palosjet, skuqjet, ndryshimet në thithka apo ndonjë sekretim prej tyre.

Ekzaminoni gjinjtë tuaj duke qëndruar shtrirë: me dorën e kundërt ekzaminoni secilin gji me majat e gishtave, duke përdorur lëvizje të vogla rrethore dhe duke mbuluar tërë zonën e gjirit (nga sqetulla deri te thithka, përfshirë hapësirën mes gjinjve dhe vertikalisht nga klavikula deri poshtë gjirit).

Ekzaminoni gjinjtë tuaj duke qëndruar në këmbë: kjo bëhet më lehtë nën dush, sidomos nëse vendosni pak sapun në zonë, në mënyrë që gishtat të rrëshqasin lehtë mbi lëkurë dhe gungat të ndihen më lehtë.