Biopsia kirurgjikale e gjirit

Nëse ekzaminimet ose imazhet tregojnë se mund të keni kancer të gjirit, mjeku juaj mund t'ju drejtojë për një biopsi të gjirit me qëllim që të konfirmohet me siguri nëse keni kancer. Më shpesh do të bëhet fjalë për biopsinë me gjilpërë (CNB) ose aspirimin me gjilpërë të hollë (FNA). Megjithatë, në situata të caktuara kur rezultatet e biopsisë me gjilpërë nuk janë të qarta, mund të nevojitet një biopsi kirurgjikale (ndonjëherë e quajtur edhe biopsi e hapur).

Çfarë është biopsia kirurgjikale?

Në këtë lloj biopsie përdoret operacioni për të hequr të gjithë ose një pjesë të zonës së dyshimtë për të verifikuar praninë e qelizave kancerogjene (malinje).

Ekzistojnë dy lloje biopsish kirurgjikale:

• Biopsia incizionale heq vetëm një pjesë të zonës abnormale.
• Biopsia ekscizionale heq të gjithë tumorin ose zonën abnormale. Gjithashtu mund të hiqet edhe një pjesë (skaji) e indit normal të gjirit rreth tumorit.

Lokalizimi paraoperativ për udhëheqjen e biopsisë kirurgjikale

Nëse ndryshimi në gjirin tuaj mund të preket, kirurgu mund të kryejë biopsinë duke përdorur ndjesinë e prekjes si udhëzues. Megjithatë, nëse ndryshimi nuk mund të preket dhe/ose është i vështirë për t'u gjetur, para operacionit mund të bëhet një test me imazh, si mamografia, ultrazëri ose rezonanca magnetike (MRI), për të ndihmuar në vendosjen e një teli ose një pajisjeje tjetër lokalizimi (si farat radioaktive ose magnetike, ose reflektori radiofrekuent) në zonën e dyshimtë. Kjo e ndihmon kirurgun të gjejë vendin ku ka ndodhur ndryshimi malinj. Kjo procedurë quhet lokalizim paraoperativ.

Në rastin e lokalizimit me tel, gjiri juaj anestezohet, dhe më pas me anë të imazhit udhëhiqet një gjilpërë e hollë dhe e zbrazët deri te zona abnormale. Kur maja e gjilpërës arrin në vendin e duhur, nëpër qendrën e gjilpërës vendoset një tel i hollë. Një grep i vogël në fund të telit e mban në vend, ndërsa skaji tjetër mbetet jashtë gjirit. Gjilpëra atëherë hiqet. Pastaj shkoni në sallën e operacionit me telin e vendosur në gji. Kirurgu e përdor telin si udhëzues deri te zona që duhet hequr. Kjo metodë zakonisht kryhet të njëjtën ditë me operacionin.

Në rastin e metodave më të reja të lokalizimit, pajisja e lokalizimit vendoset në zonën e dyshimtë para ditës së operacionit tuaj, në mënyrë që të mos e bëni këtë në mëngjesin e operacionit. Farat radioaktive ose magnetike (grimca të vogla që lëshojnë një sasi shumë të vogël rrezatimi ose krijojnë fusha të vogla magnetike) ose reflektorët radiofrekuentë (pajisje të vogla që lëshojnë një sinjal të cilin mund ta njohë një pajisje e mbajtur mbi gji) mund të vendosen plotësisht brenda gjirit (ndryshe nga teli që përdoret për lokalizim). Kirurgu atëherë, me anë të një detektori dorezor në sallën e operacionit, mund të gjejë zonën e dyshimtë.

Çfarë mund të prisni nëse keni një biopsi kirurgjikale

Gjatë biopsisë kirurgjikale

Biopsia kirurgjikale rrallë kryhet në ordinancën e mjekut. Më së shpeshti kryhet në departamentin ambulator të spitalit ose në një qendër kirurgjikale. Zakonisht ju jepet anestezi lokale (barna për mpirje), së bashku me sedacion intravenoz (IV) që ju bën të përgjumur. Një opsion tjetër është që biopsia të kryhet nën anestezi të përgjithshme (ku ju jepen barna që ju vënë në gjumë dhe që bëjnë të mos ndieni dhimbje).

Lëkura e gjirit priten, dhe mjeku heq zonën e dyshimtë. Ndoshta do t'ju duhen qepje pas biopsisë kirurgjikale, dhe presioni mund të aplikohet shkurtimisht për të reduktuar gjakderdhjen. Pas kësaj, zona mbulohet me fashë sterile.

Pas biopsisë kirurgjikale

Biopsia mund të shkaktojë gjakderdhje, mavijosje ose ënjtje. Kjo mund ta bëjë gjirin të duket më i madh pas biopsisë. Kjo më së shpeshti nuk është arsye për shqetësim, dhe mavijosja e ënjtja do të zhduken me kalimin e kohës. Mjeku ose infermierja juaj do t'ju shpjegojë si të kujdeseni për vendin e biopsisë, sa (dhe për sa kohë) duhet të kufizoni aktivitetet, si dhe kur duhet t'i kontaktoni nëse keni ndonjë problem.

Biopsia kirurgjikale mund të lërë një shenjë (cikatriks). Gjithashtu, mund të vini re ndryshim në formën e gjirit, në varësi të sasisë së indit të gjirit të hequr.

Çfarë tregon biopsia kirurgjikale?

Patologu do të analizojë indin e biopsisë nën mikroskop për të përcaktuar praninë e qelizave kancerogjene.

Pyesni mjekun tuaj kur mund të prisni rezultatet e biopsisë. Hapat e ardhshëm do të varen nga rezultatet e biopsisë. Nëse në biopsi nuk gjenden qeliza kancerogjene, mjeku juaj do të diskutojë me ju nëse nevojiten teste të tjera, si dhe kur duhet të bëni mamografinë e radhës dhe ekzaminime të tjera kontrolli. Nëse konstatohet se keni kancer të gjirit, mund të kryhen teste laboratorike shtesë mbi ind për të mësuar më shumë rreth llojit tuaj të kancerit dhe si trajtohet më së miri. Mjeku juaj do të diskutojë me ju rreth këtyre testeve dhe cilët do të jenë hapat e ardhshëm në trajtim.

Lexoni më shumë rreth temave të dobishme në blogun tonë.

Burimi: American Cancer Society