Karcinoma fungoide e gjirit

Të kuptuarit e shenjave të karcinomës fungoide të gjirit dhe rëndësisë së ndërhyrjes së hershme mund t'ju ndihmojë të hartoni së bashku me mjekun tuaj planin më të mirë të trajtimit. Tumoret që depërtojnë lëkurën e gjirit janë të rralla. Shumë terapi të zakonshme për kancerin e gjirit — përfshirë kimioterapinë, rrezatimin (radioterapinë), terapinë hormonale dhe imunoterapinë — mund të përdoren për zvogëlimin e tumorit të njohur si tumor fungoid.

Çfarë është karcinoma fungoide e gjirit?

Karcinomat fungoide (ose ulceruese) të gjirit janë karcinoma të rralla që rriten përmes lëkurës së gjirit. Termi fungoide i referohet pamjes së tumorit kur depërton lëkurën — shpesh ngjason me formën e një kërpudhe ose lulelakre. Vetëm rreth 2% deri në 5% e karcinomave të gjirit të përparuara lokalisht — te të cilat tumori është përhapur jashtë gjirit — zhvillojnë plagë fungoide.

Duhet të lexoni: Karcinoma metastatike e gjirit.

„Shumë lloje kancerësh mund të depërtojnë përfundimisht lëkurën, duke përfshirë tumoret e kokës dhe qafës, lëkurës dhe gjirit“, thotë dr. Anne Peled, specialiste për kancerin e gjirit.

Nëse kanceri zhvillohet afër lëkurës së gjirit dhe vazhdon të rritet pa u trajtuar, tumori mund të depërtojë në shtresat e lëkurës dhe të shkatërrojë indin e lëkurës, duke shkaktuar një plagë të hapur. Në atë moment, tumori konsiderohet fungoid.

Si zhvillohet karcinoma fungoide e gjirit?

Karcinoma fungoide e gjirit fillon njësoj si shumica e të tjerëve — qelizat jonormale në gji fillojnë të rriten dhe të ndahen në mënyrë të pakontrolluar.

Tumoret fungoide fillojnë të vegjël, por nëse nuk zbulohen dhe nuk trajtohen, mund të rriten ndjeshëm, shpjegon dr. Dhivya Srinivasa, specialiste e kirurgjisë plastike dhe rindërtuese mikrokirurgjike.

„Shpejtësia e rritjes varet nga lloji i tumorit. Disa janë agresivë dhe përparojnë shpejt, ndërsa ata më pak agresivë rriten më ngadalë.“

Për shkak se këta tumore mund të duken fillimisht të padëmshëm, dr. Peled thotë se mund të ngatërrohen gabimisht me një infeksion ose kafshim insekti. „Shpesh bëhen të mëdhenj sepse kanë mbetur të pazbuluar ose nuk janë diagnostikuar në kohë“, shton ajo.

Simptomat e karcinomës fungoide të gjirit

Mënyra më e mirë për të njohur ndryshimet e dyshimta në gjinj është vëzhgimi i rregullt i pamjes së tyre përmes vetëkontrolleve dhe mamografive.

Lexoni: Mamografia

„Nëse vëreni ndonjë gungë ose ndryshim të ri në gji, sigurisht kontrolloni te mjeku juaj“, këshillon dr. Peled.

Simptomat e karcinomës fungoide të gjirit mund të përfshijnë:

• ulcerë ose plagë të hapur në gji
• lëkurë të infektuar ose të inflamuar me skuqje dhe ënjtje
• lëkurë të errësuar, që mund të tregojë ind të vdekur
• dhembje në vendin e tumorit
• erë të pakëndshme
• sekretim nga plaga
• gjakderdhje

Si diagnostikohet karcinoma fungoide e gjirit?

Zakonisht karcinoma fungoide e gjirit diagnostikohet kur personi vëren një plagë ose ajo zbulohet gjatë një ekzaminimi klinik, shpjegon dr. Peled. „Ndonëse disa mjekë fillimisht mund të mos mendojnë për kancer të gjirit, rekomandojmë që çdo ndryshim i ri në gji, që nuk kalon as pas disa javësh, të ekzaminohet me metoda radiologjike ose biopsi për të përjashtuar kancerin.“

Metodat radiologjike mund të përfshijnë mamografinë, ultrazërin ose të dyja, për të zbuluar nëse ekziston një tumor nën lëkurë. Gjithashtu mund të kryhet biopsi e lëkurës ose aspirim me gjilpërë për të përcaktuar nëse tumori është malinj apo beninj (jokeq).

Lexoni më shumë: Biopsia e gjirit.

Megjithëse karcinomat fungoide të gjirit shpesh diagnostikohen në stade më të vona, kjo nuk është gjithmonë rasti. Dr. Srinivasa vëren: „Është e mundur të kesh një tumor lokalisht agresiv që ende nuk është përhapur.“

Trajtimi i karcinomës fungoide të gjirit

Trajtimi varet nga lloji i tumorit, si dhe mosha dhe gjendja e përgjithshme shëndetësore e pacientes. Zakonisht përfshin një kombinim terapish, ndër të cilat mund të jenë:

• operacion
• kimioterapi
• radioterapi
• terapi hormonale
• imunoterapi

Sipas fjalëve të dr. Peled, kimioterapia, imunoterapia ose terapia hormonale mund të përdoren për zvogëlimin e tumorit — ndonjëherë deri në atë masë sa pothuajse zhduket. Pas kësaj, tumori i mbetur mund të hiqet kirurgjikisht, dhe plaga të mbyllet.

Është e mundur të shërohet plotësisht karcinoma fungoide e gjirit, thekson dr. Peled. Megjithatë, nëse tumori është tepër i madh dhe nuk është e mundur të mbyllet plaga në mënyrë të sigurt, operacioni mund të mos jetë opsion. Në atë rast përdoret radioterapia për të kontrolluar gjakderdhjen dhe dhembjen.

Kujdesi për plagën

Nëse plaga nuk mund të mbyllet kirurgjikisht, ekipi mjekësor merr përsipër kujdesin e mëtejshëm, ndërsa pacienti vazhdon forma të tjera trajtimi për ta zvogëluar tumorin edhe më shumë. Kujdesin për plagët zakonisht e drejton kirurgu.

„Është e rëndësishme të minimizohet gjakderdhja, të sigurohet komoditet dhe kontroll i dhembjes. Gjithashtu është kyçe që plaga të mbetet e pastër dhe pa infeksion“, këshillon dr. Srinivasa.

Masat e zakonshme të kujdesit përfshijnë:

• Larjen e plagës me ujë të distiluar, ujë çezme dhe sapun mjekësor të lëngshëm
• Përdorimin e fashave dhe leukoplasteve thithëse që e mbajnë plagën të thatë.
• Përdorimin e antibiotikëve ose agjentëve të tjerë antimikrobikë për trajtimin ose parandalimin e infeksionit

Shëndeti mendor

Trajtimi i karcinomës fungoide të gjirit nuk përfshin vetëm simptomat fizike. Ky lloj tumori mund të ndikojë ndjeshëm në shëndetin mendor. Hulumtimet tregojnë se personat me këta tumore mund të përjetojnë turp, ankth, ulje të vetëbesimit dhe imazh të prishur trupor për shkak të plagëve dhe ulcerave të mëdha në gji. Për këtë arsye, trajtimi mund të përfshijë edhe mbështetje psikologjike, këshillim ose terapi me antidepresivë.

Informohuni për tema të tjera të dobishme në blogun tonë.

Burimi: Breastcancer.org