Hiperplazija e gjirit

Hiperplazia është rritje e tepërt e qelizave që veshin lobulet (gjëndrat që prodhojnë qumësht) ose kanalet (gypat e vegjël) brenda gjirit. Nuk është kancer, por disa lloje të hiperplazisë lidhen me rrezik të shtuar për zhvillimin e kancerit të gjirit.

Diagnoza e hiperplazisë

Hiperplazia mund të përshkruhet si e zakonshme ose atipike, në bazë të pamjes së qelizave nën mikroskop.

• Në hiperplazinë duktale të zakonshme ndodh rritje e tepërt e qelizave që veshin kanalet e gjirit, por qelizat duken pothuajse normale.

• Në hiperplazinë atipike qelizat duken të shtrembëruara dhe jonormale. Kjo mund të jetë hiperplazi duktale atipike (ADH) ose hiperplazi lobulare atipike (ALH).

Hiperplazia zakonisht nuk shkakton nyje të prekshme, por ndonjëherë mund të shkaktojë ndryshime që shihen në mamografi. Diagnoza vendoset me biopsi, gjatë së cilës me gjilpërë të zbrazët ose me operacion hiqet një pjesë e indit jonormal të gjirit për t'u testuar.

Lexoni më shumë: Si vendoset diagnoza e kancerit të gjirit?

Si ndikon hiperplazia në rrezikun e kancerit të gjirit?

Hiperplazia mund të ndikojë në rrezikun e kancerit të gjirit, por në çfarë shkalle varet nga lloji i hiperplazisë:

• Hiperplazia duktale e zakonshme (e njohur edhe si hiperplazi e moderuar ose floride e tipit të zakonshëm, pa atipi): Rreziku i kancerit të gjirit është rreth 1½ deri në 2 herë më i lartë krahasuar me gratë pa anomali në gjinj.

• Hiperplazia atipike (qoftë ADH apo ALH): Rreziku i kancerit të gjirit është rreth 4 deri në 5 herë më i lartë krahasuar me gratë pa anomali në gjinj.

Trajtimi i hiperplazisë

Hiperplazia duktale e zakonshme konsiderohet gjetje normale në gji dhe nuk kërkon trajtim.
Nëse ADH ose ALH gjendet në mostrën e marrë me biopsi me gjilpërë, mund të rekomandohet operacion për të hequr një pjesë më të madhe të indit të gjirit rreth zonës së prekur. Kjo bëhet për të përjashtuar mundësinë e ekzistencës së një sëmundjeje më serioze, si kanceri, në afërsi të menjëhershme. Nëse ADH ose ALH zbulohet pas biopsisë kirurgjikale, zakonisht nuk nevojitet trajtim shtesë.

Më shumë rreth biopsisë mund të lexoni këtu: Biopsia e gjirit.

Zvogëlimi i rrezikut të kancerit të gjirit ose zbulimi i tij në kohë

Si ADH ashtu edhe ALH lidhen me rrezik të shtuar për kancer të gjirit. Edhe pse shumica e grave me ADH ose ALH nuk do të zhvillojnë kancer të gjirit, është e rëndësishme të bisedoni me punonjësin shëndetësor për rrezikun tuaj dhe se çfarë mund të bëni në lidhje me të.

Opsionet për gratë me rrezik më të lartë të kancerit të gjirit për shkak të ADH-së ose ALH-së mund të përfshijnë:

• Kontrolle mjekësore më të shpeshta (për shembull çdo 6 deri në 12 muaj) që përfshijnë ekzaminim të gjinjve dhe mamografi vjetore. Mund të rekomandohet edhe rezonancë magnetike shtesë e gjinjve, veçanërisht nëse keni edhe faktorë të tjerë që rrisin rrezikun e kancerit të gjirit. Më shumë rreth mamografisë lexoni këtu: Mamografia.

• Ndryshime në stilin e jetesës me qëllim zvogëlimin e rrezikut të kancerit të gjirit. Për më shumë informacione lexoni: Nutrientët dhe ushqimet që mbrojnë nga kanceri i gjirit – Udhëzime të rëndësishme parandaluese

• Marrja e medikamenteve që ndihmojnë në zvogëlimin e rrezikut të kancerit të gjirit.

Ju rekomandojmë të lexoni edhe tekstet e tjera në blogun tonë.

Burimi: American Cancer Society