Imunohistokimia (IHC) dhe karcinoma e gjirit

Testet IHC përdoren për të përcaktuar nëse qelizat e kancerit të gjirit kanë receptorë HER2 dhe/ose receptorë hormonalë në sipërfaqen e tyre.

IHC, ose imunohistokimia, është një metodë e veçantë ngjyrosjeje që aplikohet në indin e freskët ose të ngrirë të kancerit të gjirit të marrë gjatë biopsisë. Kjo metodë u mundëson mjekëve të shohin nëse qelizat e kancerit kanë receptorë HER2 dhe/ose receptorë për hormone në sipërfaqen e tyre. Këto informacione janë kyçe për planifikimin e trajtimit.

Ju rekomandojmë të lexoni edhe këtë tekst: Statusi HER2

Testimi IHC për HER2

IHC është testi më i përdorur për të zbuluar nëse tumori ka sasi të tepërt të receptorëve proteinikë HER2 në sipërfaqen e qelizave të kancerit. Kur ka tepricë të receptorëve HER2, qelizat marrin shumë sinjale për rritje dhe ndarje.

Rezultati i testit IHC shprehet me një vlerësim nga 0 deri në 3+, që tregon sasinë e receptorëve HER2 në sipërfaqen e qelizave në mostrën e indit të kancerit të gjirit:

• Rezultati 0 deri në 1+ konsiderohet HER2 negativ.

• Rezultati 2+ konsiderohet kufitar (borderline).

• Rezultati 3+ konsiderohet HER2 pozitiv.

Dimë se shumë karcinoma të gjirit që janë klasifikuar si HER2-negative, prapëseprapë kanë një sasi të caktuar të proteinës HER2 në sipërfaqen e qelizave. Megjithatë, ajo sasi nuk është e mjaftueshme që kanceri të konsiderohet HER2-pozitiv. Këto karcinoma tani quhen HER2-të ulëta (HER2-low).

Lexoni më shumë: Kanceri i gjirit HER2 ultra-i ulët pozitiv

Karcinoma e gjirit HER2-e ulët ka rezultat 1+ në testin IHC, ose rezultat 2+ në testin IHC me test FISH negativ (lloj tjetër testimi laboratorik).

Rezultatet e testimit IHC janë më të besueshme kur mostrat analizohen të freskëta ose të ngrira. Testi IHC është më pak i besueshëm kur përdoret në ind të konservuar në dyllë ose kimikate.

Testimi IHC për receptorët hormonalë

Shumica e laboratorëve përdorin testin IHC për të përcaktuar ekzistencën e receptorëve hormonalë në qelizat e kancerit të gjirit. Nëse receptorët hormonalë janë të pranishëm, kjo do të thotë se rritjen e kancerit e nxisin hormonet estrogjen dhe/ose progesteron.

Jo të gjithë laboratorët janë të njëjtë – përdorin metoda të ndryshme analize dhe mënyra të ndryshme paraqitjeje të rezultateve. Mënyrat e mundshme të paraqitjes së rezultateve përfshijnë:

• Përqindje: tregon sa nga 100 qeliza janë pozitive për receptorë hormonalë. Rezultati mund të jetë mes 0% (pa receptorë) dhe 100% (të gjitha qelizat kanë receptorë).

• Shkallë nga 0 deri në 3: 0 do të thotë se nuk ka receptorë, 1 tregon numër të vogël, 2 numër mesatar, dhe 3 numër të madh receptorësh.

• Rezultati Allred: vlerësim mes 0 dhe 8, i cili merr parasysh si përqindjen e qelizave me receptorë ashtu edhe intensitetin e ngjyrosjes. Sa më i lartë të jetë rezultati, aq më shumë receptorë janë të pranishëm dhe aq më lehtë vërehen në mostër.

• Rezultat përshkrues: me fjalët "pozitiv" ose "negativ".

Është e rëndësishme që testimi të kryhet për të dy llojet e receptorëve hormonalë – receptorët e estrogjenit dhe të progesteronit.

Nëse merrni vetëm fjalën "pozitiv" ose "negativ" si rezultat, kërkoni nga mjeku juaj t'ju shpjegojë përqindjen ose vlerësimin e saktë. Laboratorë të ndryshëm përdorin vlera kufitare të ndryshme për të përcaktuar nëse kanceri është hormonal-receptor-pozitiv apo negativ. Për shembull, nëse më pak se 10% e qelizave tregojnë prani të receptorëve, një laborator mund ta konsiderojë këtë negativ, ndërsa një tjetër mund ta konsiderojë pozitiv, edhe pse rezultati është i ulët.

Hulumtimet kanë treguar se çdo rezultat pozitiv, qoftë edhe shumë i ulët, mund të nënkuptojë se terapia hormonale mund të ndihmojë në trajtimin e kancerit. Vetëm rezultati 0 e përjashton terapinë hormonale si opsion trajtimi.

Ekzistojnë disa lloje të terapisë hormonale.

Kur statusi i hormoneve nuk dihet

Ndonjëherë nga laboratori mund të vijë një raport se statusi hormonal është "i panjohur". Kjo mund të nënkuptojë disa gjëra:

• Testi kurrë nuk është porositur ose nuk është kryer.

• Mostra e indit ka qenë shumë e vogël për rezultate të besueshme.

• Është i pranishëm një numër shumë i vogël receptorësh hormonalë.

Nëse receptorët nuk janë të pranishëm ose nuk mund të maten me saktësi, kanceri konsiderohet hormonal-receptor-negativ.

Flisni me mjekun tuaj për t'u siguruar që testi është kryer në një laborator me përvojë të madhe në testimin IHC për receptorët hormonalë. Sa më shumë përvojë të ketë laboratori, aq më të sakta janë rezultatet.

Nëse merrni një rezultat negativ, kërkoni një shpjegim të plotë pse kanceri konsiderohet hormonal-receptor-negativ. Gjithashtu, mund të kërkoni që testi të përsëritet.

Mos harroni të shqyrtoni edhe temat e tjera të dobishme në blogun tonë.

Burimi: Breastcancer.org, INC.